大家好，我係 Taylor。
好多人識我哋係因為 Sense，但未必每個人都知呢個名嘅由來。當年疫情期間，我睇咗一套叫《Sense8》嘅劇，入面講述八個人可以跨越空間、共同感受彼此嘅情緒同感官。嗰陣我就喺度諗：如果花藝都可以成為一種媒介，令大家跨越言語，直接感受到我對美嘅直覺，嗰種「共感」會係幾咁靚嘅一件事？
所以，131 唔單止係我嘅生日，佢更加係一個我想同大家「感官對接」嘅頻道。
那些跨越空間的感官共鳴
呢五年入面，世界變咗好多。我有啲客由讀書到出嚟做嘢，由一個人變成一個家庭；甚至有啲客移咗民去到好遠，但佢哋依然會搵我訂花送畀喺香港嘅朋友。
我好珍惜呢種連結。嗰份花未必係咩名貴大禮，可能只係一份輕盈、無壓力嘅小禮物，但佢代表咗一種「我喺遠方都想同你分享美」嘅心意。我堅持每個星期六晚都喺度，就係想守住呢份持續性，令 131 成為一個情感轉運站，幫大家將嗰份無聲嘅掛念傳遞出去。只要你想屋企有一抹靈魂，131 就會喺度。
這五年，我一直在練習如何與「美」對話。
啱啱開始經營 Sense 131 嗰陣，我都曾經迷惘過：花藝嘅價值，到底係在於佢陪得你幾耐，定係佢開得最靚嗰一刻嘅姿態？我試過搵一啲花期長啲、大眾化啲嘅品種，但嗰段經驗話畀我聽，如果花只係一件唔會變嘅裝飾品，我諗我未必可以堅持到今日。
我發現，真正可以觸動到心靈嘅，往往係嗰啲有靈魂嘅品種。佢哋嘅顏色可能更細膩、姿態可能更孤傲，但偏偏呢啲極致嘅美，通常同時間成反比——佢哋開得最燦爛嘅時候，亦都係最綻短暫嘅。
我揀花材，從來唔係特登避開長花期，而係我太容易畀嗰種「生命嘅跳動」吸引住。比起嗰種擺三個星期都係一成不變嘅平庸，我更加沉迷嗰三日驚艷到入心入肺嘅靈魂。睇住花瓣喺水入邊由舒展到慢慢捲曲，每一刻嘅姿態都係流動緊、無辦法複製嘅。
呢種對美感嘅誠實，喺數據上可能顯得好「唔划算」，但呢份就係我對呢份事業最溫柔嘅堅持。
🥀 盛放與凋零，都是生命最美的動態
我同好多每星期訂花嘅客人都有一種默契，就係「享受當下」。
鮮花有生命，佢會生長、亦會凋謝。好多人驚見到花謝，但在我眼中，那是另一種姿態的盛放。當花瓣開始捲曲，甚至因為重量而微微垂頭的時候，那種弧度其實帶有一種隨性的優雅，好似跳完一場舞之後的謝幕。雖然不再挺拔，但每一道摺皺都充滿了時間留下的故事感。
這種變化，是假花永遠無法給予的感動。這一步的衰落，其實是生命完成任務後的溫柔。
正因為佢會凋謝，嗰種當下嘅美先至顯得咁有價值。雖然鮮花嘅生命我哋控制唔到，但喺我眼中，每一枝花嘅線條、質地，都係我感官嘅延伸。我希望你收到花嗰一刻，感受到嘅唔係一件貨物，而係一份關於生命與美嘅「共同經驗」。
Point 131，係我喺呢五年裏面，為大家守住一個看見美、感受美嘅角落。
多謝你哋，陪我由第一個 1.31，行到嚟呢度。
